Britania largohet zyrtarisht nga BE, Johnson: Ky nuk është fundi, por fillimi

Bota

Britania nuk është më pjesë e Bashkimit Evropian. Ky vend i ka dhënë fund anëtarësisë 47-vjeçare në bllokun evropian, duke e lënë atë me 27 anëtarë.

Britania tani e tutje do të konsiderohet nga BE-ja si shtet i tretë dhe Përfaqësimi i saj i Përhershëm në këtë bllok do të shndërrohet në mision të jashtëm. Pas largimit, Mbretëria e Bashkuar do të hyjë në një periudhë tranzitore 11-mujore, në të cilën do të zbatojë rregullat e bllokut evropian mirëpo nuk do të përfaqësohet në institucionet e tij.

Kjo periudhë pritet të zgjasë deri më 31 dhjetor të këtij viti. Vendimi për largim të Britanisë nga blloku evropian ka ardhur pasi 52 për qind e votuesve kanë votuar për dalje të Britanisë nga BE-ja kundruall 48 për qind që kanë kundërshtuar atë, në referendumin e mbajtur më 2016.​ Reagimet për largimin e Britanisë nga BE-ja kanë qenë të shumta dhe të ndryshme.

“Puna jonë si qeveri, puna ime, është që të bashkoj këtë vend dhe të shkojmë përpara”, theksoi kryeministri britanik, Boris Johnson, ndërsa lideri opozitar në Britani, Jeremy Corbyn tha se vendi i Britanisë në botë nuk do të ndryshojë kurrë. Pyetja është se çfarë drejtimi marrim ne tani. Ish-presidenti i Këshillit Evropian, Donald Tusk: “Miqtë e mi britanikë. Ne kemi qenë, jemi dhe do të jemi gjithmonë komunitet.

Asnjë Brexit nuk do ta ndryshojë këtë gjë”. Ndërsa sekretari amerikan i Shtetit, Mike Pompeo tha se Populli britanik dëshiroi të ishte jashtë tiranisë së Brukselit. Ata duan të kenë kapacitet për të marrë vetë vendime. Edhe ne e duam këtë gjë për popullin britanik”. Por ndryshe ka menduar ish-kryeministri britanik, Tony Blair. “Unë e kam kundërshtuar Brexitin me secilën pjesë të qenies sime politike. Ndihem keq, si politikisht ashtu edhe emocionisht”./REL